UNIEK GESKAPE

Ek maak lappoppe en wanneer ek een voltooi het, is dit nooit presies soos die vorige nie, al het ek dieselfde patroon gebruik. Elke pop het haar eie, sal ek se... persoonlikheid, haar lyfie en bene is anders, miskien meer gestop of langer of dunner, die handjies lyk ook nooit dieselfde nie. Die gesiggies teken ek self en natuurlik sal dit dan nooit dieselfde lyk nie. Met ander woorde elkeen is uniek.

So is ons ook deur God geskape, UNIEK. Ek maak soms foute met my poppe en dan moet ek gou iets bedink om die fout reg te stel of verdoesel.Wanneer ek 'n pop voltooi het, skryf ek 'n kaartjie met haar naam, geboorte datum en 'n kort boodskappie oor haar persoonlikheid, heg dit aan haar vas.

Met God se skepping is dit anders... ons kan net ons oorsprong vind in God, ons identiteit, ons doel, ons onderskeiding van ander en ons toekoms. Ons identiteit hang nie aan 'n kaartjie om ons nekke nie, daarom moet ons mooi luister as iemand met ons praat, selfs in sy oe kyk om sy/haar regte persoonlikheid agter te kom. Ek weet dat jy kan agterkom of iemand vir jou jok deur na die beweging van die oe te kyk. Wanneer iemand nie die volle waarheid vertel nie beweeg sy/haar oe van links na regs.

Sommer net 'n interessante feit, want ons oe is mos die vensters van ons siel. ONS IS VIR GOD GEMAAK, NIE HY VIR ONS NIE daarom sal ons nerens op aarde ons doel vir ons lewens uitvind behalwe by Hom nie.

Obsession with self in these matters is a dead end; attention to God leads us out into the open, into a spacious, free life. Rom. 8:6

ONDER DIE STERRE

Ons het op 'n Karooplaas groot geword, daar is die sterre en son mos nader. Na aandete het ons buite gesit en die sterre dopgehou, gelukkig was daar nog nie TV nie. Ons het kosbare tyd spandeer saam met ons ouers wat vir ons geleer het waar sit die Suiderkruis, die Melkweg, Jupitor, ons het die maan bewonder en wanneer hy vol was kon ons die hele plaaswerf sien, dan het ons in sy lig gesit en gesels tot laat. Die fluweelnag agter die sterre was buite ons bereik maar tog deel van die wonderlike skepping van God.

Ken jy die mag van God? Weet jy hoe het Hy die uitspansel gemaak? Het jy al gewonder oor gister, vandag en more, hoe weet hul van mekaar? Wat laasnag gebeur het is miskien vir mense bedek maar nie vir God nie. Sonder om te praat, te skree, te roep weet die heelal van God se wonderlike instandhouding. Wanneer ons na die uitspansel kyk kom ons iets agter van God se majesteit...daar gaan 'n boodskap van dit uit na ons hier op aarde. Hoe word alles so presies wiskundig bepaal? Wanneer jy weer die geleentheid het om in 'n oop stuk veld onder die sterre te sit met net die naggeluide om jou, luister na die sterre en voel hoe jy die grootsheid van God ervaar. Ps 19 :2 ...die uitspansel maak die werk van Sy hande bekend.